زمن العجايب

زمن العجايب

حن قلبى لأيام وكانت … من زمن الحب الجميل

زمان وعدى وراحت حلاوته .. كان كل معنى فيه أصيل

والله احنا فى زمن العجايب

الصديق كان خل وافى … كلمته تطيب وتشفى

ملاك وقلبه صافى ودافى … لمسة محبه من ايده تشفى

فينك يا خلى فى زمن الجايب .. لا عاد صحاب ولا عاد حبايب

والله احنا فى زمن العجايب

وفينك يا خويا يا ابن ابويا وامى .. ياللى شلت عنى همى

كنت جنبى حته منى .. مرسى بحرى همسى وسرى

فرقتنا كتير المصالح .. ايد بتسلم وعيون بتتلاقى

وقلبك بعيد يا خويا عن حضنى

والله احنا فى زمن العجايب

وفينك يا جارى … ياللى كنت أقرب من أهلى وناسى

ببتسامة تفوت تمسى … وصباحك نادى وسكر

والكلمة منك ورد معطر … سيرة محبة وعشرة أصيلة

راحت معانى الجيرة الجميلة

والله احنا فى زمن العجايب

نفوسنا كانت صفا وسماحة … وديارنا كانت بالحب واحة

الأنس كان صفو الأحبة .. وكنا للغريب فرشة وراحة

ليه النهارده جوانا خوف .. والأمان هجر قلوبنا

والغدر أصبح عالمكشوف … والوهم ليه سكن عقولنا

ليه كل يوم علينا يفوت .. أجمل ما فينا يموت

والله احنا فى زمن العجايب

كنا فى طريقنا بنرمى السلام … والكل كان لينا حبيب

فى الشوارع .. فى الحارات … الكل كان من قلوبنا قريب

عيون طيبة تسعد صباحك … تدعيلك ولو كنت عنها غريب

والله احنا فى زمن العجايب

مش بس المحبة هى اللى غابت .. دى الشهامة والكرامة

وعزة الإنسان ياخساة راحت

أب قاسي وأبن جاحد … والأنسانية جوانا ماتت

أبسط حقوق الإنسان .. فى زحمة الطغيان

يا خسارة ضاعت وتاهت

وفين نلقى الرحمة والشفقة … وفين نلقى الصدق والإخلاص

بعد ما نور الدين انعدم … من قلوب بعض الناس

صحيح بنشوفهم بنى أدميين .. لكن معدومين الشعور والأحساس

والله احنا فى زمن العجايب

وليه نلوم على الأيام … ونعتب عليك يا زمان

لا فى يوم غابت شمسنا … ولا فى يوم بطلت الأرض دوارن

ولا الشجر يوم غير خضاره … ولا الصبر أصبح ريحان

والنجمه لسه مزينة الليالى … والقمر طول عمره سهران

كل اللى اتغير انت … ياللى كان أسمك إنسان

وفين انت يا إنسان … دورت عليك فى كل مكان

لقيتك سراب إنسان … ضاعت ملامحك

ذادت جوارحك … لقيتك خالى من الروح والوجدان

والإنسان .. يعنى الأمان .. يعنى الحب .. يعنى الحنان

يعنى الشفقة والرحمة … والعدل والتقوى والإيمان

لابس بفخر توب الخطية.. فارد جناح من الظلم والطغيان

وفى الحقيقة انك ضعيف .. أصغر من أن يكون لك كيان

والله أحنا فى زمن العجايب