المنتديات البهائية العربية
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

عقيدتى ام وطنى

اذهب الى الأسفل

عقيدتى ام وطنى Empty عقيدتى ام وطنى

مُساهمة  امال رياض الجمعة أغسطس 01, 2008 11:54 am

منذ حوالى اربع سنوات والبهائيون فى مصر يعيشون فى حالة موت مدنى

وتوقف تام لكل احوالهم المدنية من شهادات ميلاد وبطاقات هوية وغيرها من

اوراق ثبوتية وهذا لأنهم يعتنقون البهائية ويرفضون ان تكتب لهم اى ديانة اخرى

غير ما يعتنقون , لقد طلب منهم ان يختاروا ديانة من الثلاث ديانات وهى اليهودية

او المسيحية او الأسلام وحين رفضوا هذا الكذب والتزوير فى الأوراق الرسمية قامت الدنيا

ولم تقعد عليهم , وقد اثارنى موقف فى احدى البرامج التى حضرها البهائيون مع بعض

علماء الدين الأسلامى حين قام العالم الفاضل بالهجوم على البهائيين واتهامهم بالكفر

وطبعآ هذا ليس من حقه حيث ليس من حق البشر ان يكفروا بشر مثلهم لأن الله تعالى

لم يعطى احد الولاية بتكفير الآخرين , المهم ما اثارنى هو قول الشيخ الفاضل بأننا ذنادقة

ولا يجب ان نعيش فى مصر بل نترك ارضنا ونرحل عنها وليس لنا حق العيش فيها

كلام لا يقره اى منصف او مؤمن بأى دين لأن كل الأديان السماوية حثت على التآخى

والمحبة وقبول الآخر اى ان كانت عقيدتة ولا اى قانون او دستور يقر على هذا فالدين

لله والوطن للجميع ,,, فكتبت تحية حب لبلدى الغالى يصرخ بها قلبى ووجدانى قبل لسانى



مصرية انا مصرية

ومصريتى غالية عليا ……. وأغلى من ضى عنيا


يا زينه يا بلدى يا حبيبة ….انتى الآمان والدفى والطيبة

وفى قلبك انتى الحنية …… مصرية انا مصرية


انا اللى كبرت على أرضك .. تحت شجرك وقمرك وضلك

وانا اللى سهرت فى ضيا قمرك .. أرسم أحلامى الوردية


مصرية انا مصرية ***************


واللى روانى نيلك ……… وميته أحلى من السكر

على ضفافة واقف ….. جدع حليوة أسمر


بيقول غناوى الحب ……. لصبية بتوب أخضر

عيونها بلون الليل …….. ضحكتها مسك وعنبر

سحر الجمال ساكن …….. خدودها الوردية


مصرية انا مصرية ****************


وعلى بساطك أتجمعوا … خلان وفى وسطهم راوى

ماسك ربابة عاشقة النغم …. بتقول وتنشد حكاوى


وأصيلك يا شمس ………. مايل فى حضن الغناوى

فارد شعاع من دهب ….. على أرضك الحرة الأبية


مصرية انا مصرية *****************


ولادك يا بلدى دول ناسى …… وكل أصحابى

فى أفراحى بشوفهم … أهلى وأحبابى


وفى شدتى بلاقيهم ……… ديمآ على بابى

يمسحوا دمع الحزن ….. بصفاء القلب والنية


مصرية انا مصرية *************


وولدك ده ولد فارس ……. من ولاد بلدى

هو أخويا وأبن عمى … وأبويا وولدى


عيونه أمل نهار …. وصوته نبض الحرية

على كتافه حملك يا بلد … واجب ومسؤولية


بيحول الأمل عمل …. بالفعل مش بالكلام

يتمنى يطلع نهارك … يا بلد فى يوم من الأيام

ويكون غيامك ده ….. سحابة صيف معدية


مصرية انا مصرية *************


مشيتك يا بلدى …… حارة ودرب وشارع

دخلت المعابد …….. والكنايس والجوامع


لقيت حس الإيمان واحد .. والكل خاشع لحب الكلمة الألهية


مصرية انا مصرية **************


أوصف أيه وجمالك ….. يا حلوتى قصة وحكاية

وأسمك على لسانى ………. موالى وغنايا


عاشقة جمال ليلك …. ويا رتنى كنت نجماية

سهرانة ويا القمر … أونس عيون الصبايا

وأستنى بشوق شمسك …. بأنوارها الفضية


مصية انا مصرية *************


بيخيرونى ليه بين دينى …. وأرض بلادى

دى أرض أمى وأبويا … ومن قبلهم أجدادى


ومن بعدى حضن ……… لولادى وأحفادى

جيل من بعد جيل ……. بحبك يا مصر بينادى

أنتى كرامتى وعزتى …. وكل شىء ليا


مصرية انا مصرية … ومصريتى غالية عليا

امال رياض
مشرف

عدد المساهمات : 420
تاريخ التسجيل : 15/02/2008

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى